මේ කතාව 2013 වැලන්ටයින් වෙනුවෙන් ලියපු එකකි, මුල් රචකයන් දෙදෙනාගේ අවසරය ඇතුව පලකරන ලදී.
(ඡේද අවසානයේ වරහන් තුළ ඇති ඉලක්කම එම ඡේදය සඳහා යොදාගත් ගීත ප්‍රමාණයයි)

- Y දිස් කොලවරි D -

පිංවතුනි සන්සුන්වන්න.. අද වර්ෂ 2013ක් වූ පෙබරවාරි මස 14 වෙනිදා.. මේ උතුම් වූ වැලන්ටයින් දිනයේ ඔබ සැම මෙහි රැස්වෙලා බොහොම ආදරෙන් එකිනෙකා බදාගෙන ඉඹගෙන ඉන්නවා දැක්කම මට මතක් වෙනවා එක කතාවක්.. ඒ කතාව පටන් ගන්නෙ මෙහෙමයි..

දම් පාටින් ලා සඳ බැස යනවා ආකාසේ රන්වන් පාටයි.. නිහඬ මාවතේ පාළු නිවහනේ රැය පහන් කළා ඔබ ගැන සිතමින් මා හද උමතුවෙන්.. නීල නුවන් දකිනා තුරු ඔබගේ මා නෙත් අවදියෙන්.. කිරි වෙහෙරට යන පාරේ මල් විකුණන මගේ සීදේවී සිහිවෙන විට මට ඉවසුම් නෑ.. දුක සේ ගෙවමී මේ කෙටි කලත්..
මහ වැස්සක ලකුණු කියන වලාකුළක් පාත් වෙලා, මිණි මිණි පොද වැටේවි ඔබ තෙමෙයි කියා බයයි වැසි වසියි සුළං තදයි.. අහස නුඹ මෙතරම් රළු යැයි දැනුනෙ මහ වැසි වැටුනාමයි..
වැහි දිය මහ බිම තෙමුවට තෙමුණු සුදු ගවුමේ ඇයි ද ඔබ මේ? හදිස්සියේ හනි හනිකට ඔබ එන්න ඔබ ඇවිත් යන්න එන්න.. (14)

ඔව් පිංවතුනි, ඔබ අවබෝධ කරගත් ආකාරය නිවැරදියි.. ඒ දහිරියවන්ත පුරුසයා රෑ නිදි නැතිව ඉන්නවා තමන් හිතින් පෙම් කරන පෙම්බරී දැකගන්න . අන්න ඒ වෙලාවෙදි තමයි මහ වැස්සක් වැහැලා ඒ වැස්සට තෙමිලා බෙරිවුන කෙල්ල වැස්සෙන් බේරෙන්න ඒ කොලුවගෙ ගෙට එන්නෙ.. ඉතින් පිංවතුනි මේ කොලුවා තමන්ගෙ සම්පූර්ණ පුරුස දහිරිය දාලා ඒ දැරිවිට ආදරේ ප්‍රකාශ කරනවා මෙන්න මේ විදිහට..

ඔබ දුටුව ඒ දිනේ සිත මට කීවා, පවසන්න ඒ වදන් මා මග බැලුවා.. ඔයා හිනා වෙන්න එපා ඔහොම රේණු.. ආදරේ හිතෙනවා දැක්කම දෙවඟන වාගේ ලස්සනයි.. මා කාටවත් නෑ මෙලෙසින් කියා.. අනේ රත්තරං හිතට වද නොදී තුරුළු වෙන්න ආදරෙයි කියා.. (5)

ඒක ඇහුන ගමන් ඒ දැරිවිගෙ සර්වාංගෙම විලි ලැජ්ජාවෙන් කිළිපොලා යනවා පිංවතුනි, මේ බලන්න මගේ ඇඟෙත් මයිලුත් කෙලින් වෙලා.. මල් මිටියත් අතේ තියන් කිරිවෙහෙර පැත්තට යන තමන් දිහා හොට දිග පිළිහුඩ්ඩෙක් වගේ බලාගෙන ඉන්න මේ කොලුවා ගැනත් ඒ දැරිවිගෙ හිතේ ආදරයක් තිබිලා නැත්තෙ නෑ පිංවතුනි.. ඉතින් මේ ඉස්ටෙයිට් පෝවඩ් දැරිවි උත්තර දෙනවා මෙන්න මෙහෙම..

දෑ සමන් රේණු ඉහින සියුම් සීතලේ මටම මම අවනත නොවී නුඹට බැඳි සෙනෙහෙන් ආදරේ දැයි අහනවා, මේ තරමටම ළං වෙලා මට.. මං ඉතින් මොනවා කියන්නද, ආදරේ මිස... අද හවසට මා හමුවනු මැනවී මුළු ලොවට හොරෙන්.. (5)

ඉතින් පිංවතුනි, හවසට මුණගැහෙන උත්තරීතර බලාපොරොත්තුව අර කොලුවා ඉදිරියේ තියලා ඒ දැරිවි සමුගන්නවා. හවස් වෙලා ඇවිත් කොලුවා ඒවි කියලා ඇස් රිදෙනකන් බලන් හිටියත් ඒ දුස්ට කොලුවා එන්නෙ නෑ.. ඉතින් කෙහෙල් මලක් වගේ අහිංසක සුකුමාලී මෙන්න මෙහෙම තමන්ගෙ දුක කියනවා පිංවතුනි..

සැඳෑ අඳුර ලොව ගලන වෙලාවට සැන්දෑ අහස වගේ සැරසී මට ඉන්න කියා කියන්න ඇයි ඔබ නාවේ.. ඉතින් නම් තවත් බැහැ මට, දෑස රිදෙනවා පාර බලා ඉඳලා.. හිත තලන පෙළෙන පෙම්බරාන., හිතාවතාන කියන්න, ඔබ පෙම් කර නෑ මා පෙම් කෙරුවත්.. ඔයා නිසා මගේ සිනහා කෝ දැන් හීනයේ.. ගං තෙරේ මා පාළුවේ.. (8)

තමන්ගෙ ආදරී දැකගන්න රෑ නිදි නැතිව ඉන්න කොලුවගෙ හදේ ලව් ගින්නක් වගේ.. ආහ් නෑ නෑ, ලැව් ගින්නක් වගේ පැතිරුණ ආදරේ අර කෙලි පොඩිත්තට කිව්ව දවසෙ හවසම මුන නොගැහි ඉඳීවිද? ඒක හරි අභව්‍යයි නේද පිංවතුනි?

මගෙ බිසවුනේ අසාපන්, තාමත් හන්දියෙ අඹ ගහ යට මම නුඹ එනකන්.. තරහා වනු එපා.. අයදිමි මා කමා (3)

බලන්න පිංවතුනි, රේණු උපාසිකාව ගංතෙරේ ඉඳිද්දි කොලුවා අඹ ගහ යටයි ඉඳල තියෙන්නෙ. ඒ අවාසනාවන්ත සිදුවීමෙන් ටික දවසකට පස්සෙ කොලුවා මෙන්න මෙහෙම කියනවා..

මේ ගුරු පාරේ මේ දොළ අයිනේ මග බලා හිඳිමි මා මල් මිටක් තියන්න ඔබ අතේ.. ලෝකය පෙරලෙයි කාලේ ගෙවී යයි ඔබ නාවෙ ඇයි මිහිරියේ.. තනි වී අඳුරූ යාමේ මා හඬනා මේ වෙලේ ඔබ නැති පාළුව දැනුනා ඉවසුම් නෑ.. (7)

ඊට පස්සෙ කොලුවා කොච්චර දවස් බලන් හිටියත් ඇය එන්නෙ නැහැ පිංවතුනි.. ඒ ඇයි කියලා අපි රේණු උපාසිකාවගෙ වචන වලින්ම අහමු..

මතකද ඔබට මතකද.. හිරුද මිය ගිය එක සැඳෑවක මා දෑසේ ආදරේ හැඟුම් ලියා තියා දුරක පාවී ගියා රිදවාලා ඔබ මසිත මෙසේ.. පමා වැඩියි ඔබ පමා වැඩියි, දෙමාපියන් පිට ගමකින් මට බහ දේවී.. නොපැතූ සේ යා යුතුවෙයි මේ ඉරණම් ගමනේ කඳුලින් මෙසේ.. දුරස් වන්නට මේ ලෙසින් ඇයිද අප හමුවුණේ.. දෛවයේ සරදම් ලබන්නට කිම මෙසේ අප හමුවුණේ.. (9)

මේ කොලුවා පෙම්බැන්ද පෙම්බරී ආපහු මුණගැහෙන්නෙ ඇයගෙ වෙඩිම දවසෙදි.. ඒ අවස්ථාවෙදි ඔහුගේ දුක පිටවෙන්නෙ මෙන්න මේ ආකාරයටයි පෙම්වතුනි..

පාට පොදක් තිලක ලා නළල් තලාවේ සුදු රෝස දවටා අද මනාලියක් වී ඔබ හරි ලස්සනයි.. සිතින් ඉවසන්න බෑ මේ තරම් වේදනා හිතවතෙකු මගේ ඔබගේ ඔය සුරත දරා සිටියා.. ඔබ යන්න සමු අරං.. හිත හදාගන්න බැරි වේවි, දුක දරා ගන්න බැරි වේවි, ඔබ නැතුව ඉන්න බැරි වේවී..
සමුගෙන යන්න කලින් ඔබ නොමැතිව සිනහ නගන යුරු මට කියා දී යන්න..... (7)

කෙටි කාලයෙ පෙම්වතෙක් වෙලා ඔබ ගියාම දුක මට දී මතකයන් ඔබේ හිතේ තබාගෙන වේදනා යා කළේ මායාව සේ වැළපෙන්නදෝ මේ ලෙසින්... (4)

හරිම උද්වේගකර අවස්ථාවක් දැන් උදාවෙලා තියෙන්නෙ පෙම්වතුනි, එක පැත්තක ඉඳන් කොල්ලා අඬනවා වතුර හිඳුන විලේ ඉන්න ඉබ්බා වගේ.. අනිත් පැත්තෙන් රේණු උපාසිකාව අඬනවා වඳින්න ගිය දේවාලෙ හිටිය ගොනා ඇන්න ගෑණි වගේ..

පිංවතුනි, දැන් ඔබට වැටහෙනවා නේද මේ ලෝකෙ කොයි තරම් කූරද කියලා.. රේණු දැරිවි අහිමි උන දුකෙන් ඉන්න කොලුවා එක දවසක දකිනවා ඒ උපාසිකාව තමන්ගෙ උපාසක හබියා එක්ක යන හැටි.. ඒ අවස්ථාවෙදි කොලුවට ඇතිවෙන දුකට මෙන්න මෙහෙම කියවෙනවා..

ආදර මල් පවනේ ඉරි තැලුණු වළා උඩු වියන් යටින් මුදු තාර ඇතිරිල්ලේ පෙරදිනයක මා පෙම් කළ යුවතිය වෙන් වූ තැන් කරා ආයෙමත් පැමිණිලා.. අන් සතු වී ඇත මා සතු ඒ සිත.. එයා පැළැන්දූ මංගල මුදුවේ ආඩම්බරකම මම දුටිමි.. මා සමුගෙන ඔබ වෙතට පැමිණි ඇය, සෙනෙහස සඟවා දෙනෙත් නුරාවෙන් මටද ආදරේ කියා තිබේ..
මම දන්නෑ තාම දන්නෑ අදහන්න බෑ ඔබද මේ.. සිඳලන්නෙ ඇයි ප්‍රථම ප්‍රේමේ....... (9)

පිංවතුනි ඔබලාගේ පිං රිම් එකෙන් ගියා නේද මේ කොලු පැටියාගේ තුන් කුළුඳුල් ප්‍රථම ප්‍රේමෙට උන සන්තෑසිය ඔබලාගේ කන් දෙකෙන්ම අහලා.. උතුම් වූ වැලන්ටයින් දිනයේ මේ පිංබර කතා වස්තුවෙන් ඔබලාත් පාඩමක් ඉගෙන ගන්න ඕනෑ..
දැන් බලන්න පිංවතුනි, මේ කොලුවාට තමන්ගේ පෙම්වතිය අහිමි වුනේ ඇයි කියලා... රේණු උපාසිකාව ගංතෙරේ ඉඳිද්දි කොලුවා අඹ ගහ යටයි ඉඳල තියෙන්නෙ. මේකෙන් ඔය පිංවතුන්ට ගන්න ඇහැකි ආදරුසේ මොකක්ද දන්නවද?

කවදාවත් පෙම්වතිය/පෙම්වතා හමුවෙන්න අඹ ගහක් තෝරා ගන්න එපා පිංවතුනි.. ඔය පිංවතුන්ටත් අර කොලුවා ට සිද්ධ වුන දේ වෙනවා.
අත්දුටුවයි! ප්‍රත්‍යක්ෂයි! —